.JPG)
As facturas derivadas de contratos exonerados de licitación, tanto de concellos como da Deputación de Ourense, serían escaneadas e publicadas nas webs dos concellos ou, de non ter, na páxina do organismo provincial.
A Lei 30/2007, de Contratos do Sector Público, deixa unha certa marxe de liberdade para a adxudicación no ámbito dos denominados contratos menores (cuxo importe é inferior a 50.000 € no caso das obras, ou a 18.000 €, nos restantes contratos). Isto é así, en parte, para axilizar certas intervencións por parte da administración. Sen embargo, especialmente nas entidades locais máis pequenas, moverse baixo eses baremos permite ós xestores actuar cunha grande opacidade na contratación por importes que supoñen unha porcentaxe notable do seu presuposto.
Ante esta circunstancia, as Xuventudes Socialistas de Ourense presentaron esta mañá en rolda de prensa unha proposta que queren facer extensible a todas as administracións locais da provincia, incluída a Deputación, e dirixida especialmente ós pequenos concellos, que consiste no escaneo e publicación das facturas correspondentes ós gastos non suxeitos a procedemento de licitación nas páxinas web dos concellos ou, se carecen dela ou da posibilidade de actualizala, na do organismo provincial.
Con esta medida, segundo explica o secretario xeral da organización Jonathan Da Silva, “conséguese un dobre beneficio. Por unha parte os cidadáns poden tutelar con rigorosidade a que se destina o erario local sometendo ó escrutinio público ata o último dos gastos e, por outra, o político conta cun “escaparate” no que poder amosar e constatar documentalmente a súa eficiencia como xestor.
¿ A quen non beneficia pois a medida?”
Os responsables da idea manifestaron tamén que na actualidade os medios tecnolóxicos deben servir para promover unha maior participación dos cidadáns, unha maior transparencia e unha maior eficiencia, que é o obxectivo último, xa que as empresas poderán, en función das facturas publicadas, facer propostas que melloren en calidade ou prezo a dos servizos contratados.
Pola súa banda, Antía García, vicesecretaria xeral das Xuventudes, aclarou que “parécenos que as administracións deben manter esas marxes de maniobrabilidade previstas na Lei, por axilidade, unha axilidade que, deste xeito, deixaría de ser incompatible coa transparencia”
Os xóvenes socialistas farán chegar a suxerencia ás institucións da provincia por medio dunha proposta de moción que remitirán, para que estudien a posibilidade de levala a pleno, a tódolos grupos municipais do PSdG, así como ó da Deputación, e ós concellos sen representación socialista mediante unha instancia dirixida ós alcaldes.
.JPG)
